16-11-2023, 07:34

Bodring va uzum ikki barobar qimmatladi

Oxirgi haftada bozor va do‘konlarda ayrim meva va sabzavotlarning narxi sezilarli darajada tezroq ko‘tarila boshlaganini kuzatish mumkin bo‘lmoqda. Bu haqda iqtisodchi-bloger Otabek Bakirov xabar bermoqda.

Qayd etish lozimki, Iqtisodiyot va moliya vazirligining har kuni Qo‘ylik bozoridan uzatayotgan narx indekslarida ham buni ko‘rish mumkin.

Demak, 15 noyabr kuni (https://t.me/minecofinuz/8246) holatiga 8 noyabr (https://t.me/minecofinuz/8199) bilan solishtirganda ulgurji narxlar maksimumlari quyidagicha o‘zgargan:

Sarimsoq piyoz 22 ming so‘mdan 25 ming so‘mgacha; Mandarin 30 ming so‘mdan 35 ming so‘mgacha; Pomidor 20 ming so‘mdan 25 ming so‘mgacha; Anor 23 ming so‘mdan 35 ming so‘mgacha; Behi 15 ming so‘mdan 25 ming so‘mgacha qimmatlagan.

Lekin eng sezilarli narx ko‘tarilishi bodring va uzum bilan ro‘y bergan.

Bodring yuqori narxlari 9 ming so‘mdan 25 ming so‘mgacha, uzum esa 45 ming so‘mdan 90 ming so‘mgacha oshgan.